كله النهارده اسكندراني و اكلات جديده يمكن اول مره تسمعوها
الكشك الاحمر بالجمبري الخطيييير
و السمك البلطي بالدمعه الرووووعه
و غيره كتييييير يالا قربوا و نبتدي وصفه وصفه
الاول حنجيب خضره كتير تقطعيهم و تحضيرهم في مصفاه علشان ناخد منه في الاكل
(كسبره و بقدونس و شبت و كرفس )
تاني حاجه نحضر شويه توم كده حلوين علي اد الكميه (و السمك يحب التوم ) و نضرب معاهم ملح و فلفل و كمون و بهارات سمك لو موجوده
و في الطاسه قليناه بعد ما تبلناه بدقيه التوم اللي فوق من جوه كويس و بعدين الدقيق لعمل الدمعه (حضري صينيه في من التوم اللي دقيناه و شويه زيت و اول ما ريحته تطلع نحط معلقتين تلاته خل و بعدين معلقتين صلصه زي الفته بالظبط )و اول ما تغلي اقفلي النار و رصي البلطي فيه و يا سلام لو فلفل حامي او شطه فوق الوش و غطي الصينيه و سيبيها شويه تاخد من طعم الدمعه
ننضف ضهر الجمبري كويس و نتبله من دقيه التوم و معاهم بصل كتير حلقات و فلفل رومي و طماطم حلقات و ندعك كل ده مع بعض كويس و نرص الجمبري و عليه الخلطه من فوق و من تحت و تدخل الفرن من غير مايه في الرف اللي في الوسط
نحضر بقي علبه ماسترده انا كان عندي نصها
نملا النص الباقي زيت و رجي جاااااامد و بعد ربع ساعه كده ابتدي رشي فوق الجمبري حتلاقي ريحته تحفه و ممكن فحمه مولعه في الاخر لو عايزه و دي الصور
الكابوريا المشويه في الفرن نفس طريقه الجمبري بالظبط (في ناس بتحب تفتحها و تحشيها بنفس الخلطه اللي فوق لكن انا بحبها زي ما هي بصراحه )ماحدش يسالني علي حجم الكابوريا هههه مش بقولكوا اسكندراني بقي
في جمبري بقشره صغير ده بنجيبه للكشك و الرز
بنقشره و ناخد القشر بتاعه نغليه في مايه (و خدي بقي التكه الفظييييعه دي )نحط بصل مبشور و توم بملح و فلفل و كمون و الجمبري و معلقتين صلصه و كوبايتين مايه او اكتر لو كميه الجمبري كتير
يغلي علي النار لحد ما يستوي الجمبري كويس
و نحضر كوبايتين مايه مدوب فيهم كوبايه دقيق و نحطهم علي الجمبري ووهدي النار 3 دقايق
و نعمل بصله مبشوره في معلقتين سمنه و لما تصفر بس نحطهم علي الكشك و يقدم في الاطباق
مش قادره اقولكم بيبقي طعمه ايه جربوووووه انتم و قولولي
طاجن السبيط الرهييييييب نغسل السبيط كويس بالملح
و نحضر بصله مبشوره نصفرها علي النار و نضيف التوم اللي بملح و فلفل و كمون و بعدين مكعبات طماطم او مضروبه في الخلاط و كوبايه خضره تقريبا من اللي قطعناهم في الاول
و تغلي غلوتين نضيف السبيط و الفلفل الحامي و ندخله يكمل سواه في الفرن و يحمر
السبيط المقليبعد غسل السبيط نضرب بيضه و نضيف معلقه توم كبيره من دقيه التوم اللي بالكمون و نضربهم سوا مع شويه لبن و 3 معالق دقيق
نسيبه منقوع ساعه و نطلعه في دقيق غزير و نقليه
الرز بالجمبري (حنضيفله مايه قشر الجمبري و شووووفي الريحه حتبقي عامله ازاي )نحمر بصله و لما تبقي بني فاتح مش غامقه نضيف الجمبري و مكعبات الطماطم و الفلفل الرومي و ملح و فلفل و كمون و كسبره ناشفه و نضيف مايه قشر الجمبري و نسيبه شويه لمايستوي الجمبري و نضيف الرز و لما يغلي نوطي عليه و خلاااااص 
السمك بالبطاطس في الفرن نقطع حلقات بطاطس رفيعه
و نحضر بصل مبشور و معلقتين توم بملح و فلفل و كمون و كسبره ناشفه و طماطم مكعبات و كوبايه خضره و ربع كوبايه زيت و نخلطهم كويس
و نتبل بيهم السمك من جوه و بره و البطاطس
نرص البطاطس بالتتبيله و عليها السمك و فلفل رومي حلقات و طماطم حلقات و في الفرن مع كوبايه مايه او اتنين حسب الكميه
و نطلعها لما وشها يحمر شويه
و ده طبق السلطه و انا بعمله دريسنج لوحده عباره عن
ملح و كمون و كسبره ناشفه و مسطرده و بصل حلقات و شويه بهارات و معلقه توم من خلطتنا اللي فوق و ليمون و خل و ريحان و شويه خضره [/center]
الثلاثاء أبريل 12, 2011 7:36 am
